Breaking News
recent

யாழில் கண் சத்திரசிகிச்சை செய்துகொண்டோருக்கு கிருமித்தொற்று: விசாரணைகள் ஆரம்பம்

யாழ்ப்பாணத்திலுள்ள தனியார் வைத்தியசாலையில் கண் சத்திரசிகிச்சைக்கு உட்படுத்தப்பட்ட சிலருக்கு கிருமித்தொற்று ஏற்பட்டமை தொடர்பில் இன்று விசாரணைகள் ஆரம்பிக்கப்பட்டுள்ளன.

மூவரடங்கிய விசாரணைக் குழுவினர், குறித்த தனியார் வைத்தியசாலையில் ஆய்வுகளை நடத்தினர்.
கண் சத்திரசிகிச்சையில் ஏற்பட்டதாகக் கூறப்படும் கிருமித்தொற்று குறித்து விசாரிப்பதற்காக மூவரடங்கிய விசாரணைக்குழுவினர் இன்று யாழ்ப்பாணத்திற்குச் சென்று விசாரணைகளை முன்னெடுத்தனர்.
வடமாகாண சுகாதார அமைச்சு, மத்திய சுகாதார அமைச்சிடம் விடுத்த கோரிக்கைக்கமைய இன்று விசாரணைகள் ஆரம்பிக்கப்பட்டன.
சத்திரசிகிச்சை மேற்கொள்ளப்பட்ட தனியார் வைத்தியசாலையில் ஆய்வுகளை மேற்கொண்ட விசாரணைக்குழுவினர், மாதிரிகளைப் பெற்றுக்கொண்டதாக வட மாகாண சுகாதார அமைச்சர் தெரிவித்தார்.
இதனையடுத்து, மேல் மாகாண முன்னாள் சுகாதார சேவைகள் பணிப்பாளர் டொக்டர் பரீட் தலைமையிலான குழுவினர், பாதிக்கப்பட்டவர்களிடம் விசாரணை நடத்தினர்.
இதன் பின்னர், வட மாகாண சுகாதார அமைச்சர் ஞா.குணசீலனை பாதிக்கப்பட்டவர்களும் அவர்களின் உறவினர்களும் சந்தித்தனர்.
யாழ். பண்ணையிலுள்ள வட மாகாண சுகாதார அமைச்சரின் அலுவலகத்தில் இந்த சந்திப்பு இடம்பெற்றது.
யாழ்ப்பாணத்திலுள்ள தனியார் வைத்தியசாலை ஒன்றில் கடந்த ஒக்டோபர் மாதம் 21 ஆம் திகதி 10 பேருக்கு கண் சத்திரசிகிச்சை மேற்கொள்ளப்பட்டது.
இதன்போது, கிருமித்தொற்றினால் தாம் பாதிக்கப்பட்டதாக சத்திரசிசிக்சைக்கு உட்படுத்தப்பட்டவர்கள் தெரிவித்தனர்.
இதனையடுத்து, அவர்கள் யாழ். போதனா வைத்தியசாலைக்கு மாற்றப்பட்டு, அதில் ஐவர் மேலதிக சிகிச்சைக்காக தேசிய கண் வைத்தியசாலைக்கு அனுப்பி வைக்கப்பட்டிருந்தனர்.

Jaffna Minnal Media

Jaffna Minnal Media

Powered by Blogger.